Mitglied
- Beitritt
- 12.01.2003
- Beiträge
- 146
- Zuletzt bearbeitet:
- Kommentare: 8
Neulich im Gemeindebau (Wienerisch)
Neulich im Gemeindebau
Neulich im Gemeindebau
Weltverständnis im Kleinformat
Papa: Geh Mama, host no an Aufstrich draußn?
Mama: Schweinsleber oder Liptauer?
Papa: Na kaunnst olle zwa bringa.
Mama: Zum Trinken habts no genug?
Papa: Raffael! De Mama hot di wos gfrogt!
Bua: Jaaa - siehst eh, dass ich noch was hab.
Papa: Heast, sei net so frech.
Bua: Bin nicht frech.
Papa: Daunn gib a gscheide Auntwurt.
Bua: Hab ja eh gsagt, dass ich noch was hab. Niicht, Mama! Ich hab noch was im Glas! Wieso schenkst ma noch was ein?
Mama: Jetzt sei net so blöd, du trinkst das ja eh aus.
Bua: Haaach. Ich wollt das aber zerst austrinken.
Papa: Jetzt gib amoi a Rua, heast, i hea jo nix.
Bua: Dann mach die Ohren auf.
Mama: Raffael!
Papa: A so a freche Bemerkung no und du kaunnst di glei ins Bett legn!
Bua: Aua!
Mama: Geh Fredl, des wor jetzt aber a net notwendig.
Papa: Daunn soll a de Pappn hoitn. Des geht ma jetzt scho laungsaum wo hi. Kaunn i net amoi in Ruhe fernschauen neman essen? Jetzt schau net so bled und iss weida.
Papa: Des san doch Trottln heast, wos?
Mama: Wos denn?
Papa: Na de Deitschn. Jetzt tans wieda deppat umanaund.
Mama: Aso.
Papa: Des is scho so lächerlich des Gaunze, der Saddam muaß si a wos denken, heast.
Mama: Wieso denn?
Papa: Na wie schautn des aus?
Mama: Najo, des is hoit a net so leicht, des Gaunze, nm?
Papa: Na wos haßt "net so leicht"? De soin endlich aufaunga und a Rua is. Is jo woa.
Mama: Najo.
Papa: Na wos? Des is jo wirkli scho a Witz. Des geht jetzt scho drei Monat oder so. Wirst scho segn, de werdn so laung umanaund tuan, bis erna wieda a Flieger am Schädl foit und daunn schauns wieda deppat.
Mama: Najo, oba des wor jo da Bin Laden, net?
Papa: Geh bitte, de steckn doch olle unter ana Deckn. Der Bush hot schon recht. Wenn de amoi weg san, is a Rua, wirst schon segn.
Papa: Na und glei da nächste Trottl. Wos der eigentlich wü, waß a kana oder?
Mama: Scho a bissl komisch. Zerst mit de Blauen, jetzt mit de Grünen.
Papa: Des wird eh nix, wirst eh segn. Papierln tuat as. Am End werdns eh wieda die Blauen.
Mama: Glaubst? Net Schworz-Rot?
Papa: Geh.
Papa: Schau da den au, heast, i hoit den net aus. Bringt kan grodn Sotz aussa, der Van der Bellen.
Bua: Was isn eine Koalition?
Mama: Na das is Politik, Raffael.
Bua: Na weiß ich eh, hamma eh schon in der Schule glernt, aber was is eine Koalition?
Mama: Na die Regierung. Also wenn zwei Parteien zsamm gehen, dann heißt das so.
Bua: Und wieso habn die Parteien Farben?
Mama: Na dass ma weiß, wer wer is. Schau, die Grünen heißen zum Beispiel so, weils was für die Umwelt machen.
Bua: Und die Blauen?
Mama: Na ... weil das sind die Freiheitlichen, also die nennen sich so. Oder wie kaumma des erklären, Fredl?
Bua: Hm?
Mama: Na wart, lass en Papa einmal fernschauen, er erklärts da dann nachher, gut?
Mama: Wart, kömma kurz auf die "Seitenblicke" schaun?
Papa: Geh wort a bissl, i wü eh nur schaun, wie da Mayer gfohrn is.
Bua: Kann ich noch a bissl aufbleiben?
Papa: Wos wüstn? Is eh nix für di im Fernsehen.
Bua: Na nur so.
Mama: Geh, Schatzl, morgen is ja wieder Schule, hm?
Bua: Büüütte!
Papa: Gehts scho wieda los? Wüst ane faungan?
Bua: Haaach.
Papa: Na wos?
Bua: Mmmh.
Papa: Geh, Abmarsch.
Mama: Erklärst eam no des mit der Politik?
Papa: Fia wos? Der kapiert des eh net.