- Zuletzt bearbeitet:
- Kommentare: 7
Aungschissane Windln (Wienerisch)
So löst man in Wien Probleme III: Aungschissane Windln
Die Spotzn haum zwitschat, die Blütenblattln, de vun de Bam gfoinn san, haum den Weg rosa eing´säumt und die Sunn hot herrlich g´schienan. Olles woar so friedlich. A poar Kinda haum in da Saundkistn gspüt und de Mütta san am Bankl gsessn, haum trotscht und gstrickt. Auf amoi woa a Aufschrei mittn in der Gemeindebauidylle: „Iiiiiiih!“
Olle Mütta haum natürlich sofort die Köpf in die Richtung draht: Is doch tatsächlich a so a Zwajähriga mittn in da Scheiße gsessn. Oba net in seina eigenen, sondan in an Hundehaufen. Mittn in da Saundkistn.
Natirlich haum olle glei gschimpft, der Kriag liegt jo sowieso scho längst in da Luft. Oba jetzt reichts endlich amoi. Net nur, daß ma net üba die Wiesn rennan kaunn, ohne genau zum schaun, liegn die Trümmerln jetzt a scho do bei de gaunz klaan Kinda. Wo doch a jeda waaß, wie schädlich des is, waunns des essn.
Normalaweise bleibts jo bei soiche Schimpfarein und am nächstn Tog werdn die Hundebesitza wieda freindlich griaßt.
Oba jetzt woa ane dabei, bei de Mütta, die si net ollas gfoinn lossn woit. Die net, wia die aundan, nur üba die Hundebesitza schimpfm woit und waunn daunn des Kind zwa Meta weita weg sitzt, is scho wieda a Ruah. Die woar mehr für´n Aktionismus.
A zweite hot sie si gfundn, die aktiv mitgmocht hot, Hundebesitza san ausgeforscht wordn. „Mia miassn genau wissn, wo die wohnan, denan des wurscht is, wo der Hund hinscheißt.“
Und so is hoit dazua kumman, daß die Mütta aus da Nochboaschoft zwa Tog laung die aungschissanen Windeln von de klan Kinda g´saummelt und in an Sackl bei den beiden obgebm haum. Schen z´saummglegt, sodaß des wertvolle Gut drin bleibt.
In da Nocht um zwa sans daunn losspaziert und um drei woarns fertig. Olle Windln woan auf die Türtackn festpickt, mit an weißn Klebebandl, und daunn sans zufriedn wieda hammarschiert.
G´sehn hättns´as hoit gern, wia die Hundebesitza in die Kindascheiße gstiegn san. Oba olles kaunn ma hoit net haum im Lebn, net woahr?