Mitglied
- Beitritt
- 19.02.2003
- Beiträge
- 4
Da Kammaweiha (Bayerisch)
Da Kammaweiha
Da Kammaweiha – beim Paddeln, oder wia da Kulzer Walta fast zum Rennläufer worn is.
Man möchts niad glaubn, oba i woar a amal jung und manchmal kumma oan hald so Gschichten von Fraia in den Sinn. Gschichten, an dai ma oft jahrzehntelang niad denkt hoat. Mia ham nämlich in Kloadorf einiges ogstellt!
An oa Gschicht konna me no ganz genau erinnern! Mir san in Kloadorf in d’Schul ganga, da Roidl Peta, da Liabl Kare und i, da Kulzer Walta. In da Schul hamma scho ausgmacht wos ma am Namidoch dreim kanntn. Wos gscheits is uns niad eigfalln und an Kombiuta und so neimodische Sachn hoats no niad gem. Doa hoad ona die Idee ghabt mia kanntn aufm Kammaweiha mit an Boot fahrn. alle ham glei gsagt. Oah, super! Des machma. Mia treffa uns um zwoa am Kulzer Eck und dann foarn ma Boot. „Oba mit wos für an Boot kannt ma denn foarn?“, hoat dann da Liabl Kare gfroagt. Doa is uns erscht a Liacht aufganga, das ma iberhaupt koa Boot ham. und am Kammerweiha hoat a koa Bauer an Kahn liegn ghabt den ma uns auborgn hain kinna, so wia mas am Abauernweiha scho a mal gmacht ham. Gott sei Dank hoat uns doa koana dawischt und abgsuffn san ma a niad.
A Zeitlang san ma so doagstandn und ham iberlegt woa ma a Boot herbringa kanntn. Nix is uns eigfalln. Doch dann hoat da Roidl Peta a Idee ghabt. „Mia kanntn eigentlich mit a na Luftmatratzen foarn“, hoad a gschrien. „Dös is ja super! Doa hoad jeder oane“, hoat da Liabl Kare gmoant und de Sach woar ausgmacht.
Pünklich um zwoa hamma uns dann troffa. D’Hausaufgab hamma schnell highaut ghabt, weil mia ham no niad so vial Schmarrn in da Schul lern min, wia unsere Kinder heid.
Jeda hoad sei Luftmatrazen dabeighabt und mia ham uns scho aufn Kammaweiha gfreit, doa is mia eigfalln, mia kanntn a no a Paddl braucha, dann kanntma no besser foarn. Scho san ma in D’Schupfa vom Schmalzl Hans mein Vata ganga und ham uns aus allem Möglichen woas doa rumgleng is jeder a Paddl baut. A Besenstil, a alta und a boar leichte Bredl und scho hoad jeda a Paddl ghabt. So und aizad is oba aufganga. D’Leid ham groaß und gloa gschaut wai mir mit unserer Ausrüstung daherkumma san. Groad gfühlt hamma uns, wia die graißtn Kapitäne vo Kloadorf.
Bis zum Kammaweiha woar niad weid affe und a gfährliche Umgehungsstraß, woa d’Autofahrer wai de Dumme heit vorbeirasen hoats no niad gem.
Glei hamma unsere Luftmatraten aufbloasen und wollten scho auf groaße Fahrt gi, doa is mir auf amal eigfalln, das i iberhaupt niad schwimma ko. I glab da Peta und da Kare hams scho kinnt. Recht gschammt hoba me auf oamal, oba gsagt hobe nix. I hob me auf Luftmatratzen aufeloan und bin genauso loaspaddelt wia de andern zwoa. A wahnsinniges Gefül woar des. Ganz aloa mia drei aufn Kammaweiha. Konna hoats gwisst. Mei woar des spannend wai ma a so durchs Schilf gfahrn sein. Ab und zu ham ma an Vogl oder a Antn aufgscheicht. Groad das a me no auf da Luftmatratzen halten hob kinna. Oba dann is hald doch passiert. Scho hoats me eighaut und i hob denkt aiz dasaufe. Grod das a me no an da Luftmatratzen festhalten hob kinna! Da Kare hoat glei an Peta gschrien und dann hams ma wieder auf D’ Matrazn aufgholffa. „Mensch hob i a Glick habt“, hobe gsagt und dann hobe beicht, das e iberhaupt net schwimma ko. Doa hams me recht dableckt. Des war a no ganga ---- oba dann hobe des Maleur erscht gsengn. Im Kammaweiha hoats nämlich ganz greisliche Bloadegl gem. Dös hams ma wenigstens abl fazölt. Und aizt hockt auf amal a so a Bloadegl auf mein rechten Haxn. Mensch hoat mia graust!!!! I bin richtig in Panik kumma!!!! Gschrien hobe wia am Spieß. De andern zwoa san richtig daschroka und ham goaniad so recht gwisst wos loas is. I hoa auf alle Fälle glei meine Paddl gnumma und bin ans Ufer paddlt als wia wenn da Deifl hinter mir her war. Doa hobe dann mei Luftmatrazn und mei Paddl higschmissn und bin grennt so schnells blos ganga ist. Wahrscheinlich hobe an Weltrekord im Laffa afgstellt. I bin blos grennt und hob gschrien. Mein Fuas midn Bloadegl hobe goa nimmer oschaua kinna weil e gmoant hob des Viech hoad me scho fast ausgsaugt.
Dann bin e dahoam okumma, bin oba dann niad glei zu meine Mudda grennt, weil sunst haids ja daforn, das i am Kammaweiha mit da Luftmatrazn rumgfoarn bin, obwohle goar niad schwimma ko. Doa haide dann wahrscheinlich an Anschiss graigt. Also hob e mein Haxn no amal oschaut und man mächts kaum glaum, da Bloadegl woar nimma doa und ganz ausgsaugt hod a me anscheinend a niad. Dann san a scho da Peta und da Kare kumma und ham mia mei Luftmatrazen brocht. Und i, i woar frouh, das da Bloadegl weg woar und das e meina Muadda niad beichten hoa min, das e beihna dasuffa war. Einfach Glick ghabt!
