- Zuletzt von einem Teammitglied bearbeitet:
- Kommentare: 9
Da plazate Engl (Wienerisch)
I damme stockbsoffn in ana koidn, varengtn Nocht iba meine eiganan Fiaß und sich in ana Lockn auf da Strossn de gaunze schimmande Foabnprocht von an Regnbogn.
Mei Schädl wiad so schwa, meine Zodn hängan in de dreckige Strossnlockn, im Liacht von de Bognlaumpn glänzns so goidn wia de von an Engl. I bin a speibenda Engl. Mei Nochtmoi platscht üba de Regnbognlockn. I vakräu mi in nextn Hauswinkl und platz drauf los, wö i imma ois schene zsaummhaun muaß.
Der Mau dea do aus dera Bloshittn kummt is genau dea den i mea haum wü ois ollas aundare auf dera Wöd. I druck mi no tiafa in mein Hauswinkl und beobocht sei Oart zum geh de wos eigantlich ziemlich sötsaum is. Er quatscht do in sei Hendi. So solla mi net sehgn, i bin a bsoffana zasterarischa Engl. Nie kennt da se in mi valiabn. Net in mi. I huach eahm beim telefonian zua oba begreifn tua i goa nix. Dauand geht da hin und hea mit seina sötsauman Oart. Sei Glachta hoit laut duach de Nocht. Er zasteat de Stille, untabricht des traurige Gsangl wos aus dera Hittn kummt. A er is a Zasteera. Mia san Söhnvawaundt. Oba er zasteat gaunz aundas ois i. Er was des net amoi und er plazt a net driwa. I wü schaun, vielleicht is mei Regnbogn wida do. Oba i kaunn net, wäu daunn tat da mi jo sehgn. Waunn i meine Tränan in de Lockn foin loss, vielleicht heulicht des de Lockn. Englstränan. Nau und daunn kaunn da Regnbogn wida scheinan in dera Strossnlockn. Er telefoniart und i wü eahm haum. Oba i bin so grauslich. Nie wida kaunn i in de Hittn und mia is so koid. I muaß daunn sowieso no de Lockn rettn. Irgendwos sogt da jetzt und i vastehs net. I muaß no amoi kotzn. Kaunn i leise speibn? Waunn i mi aunstreng..... oba net noamoi an Regnbogn zastean! Ma muaß schließlich aus Föhla leana. Nau guat. Nau leise woa des net. Oije, jetzt kummt da hea. Und lochn tuat da a no. Steht vua mia, schee und stoak, wia so a Raubkoz und locht. Locht owe auf an speibenden Engl, ohne Ehrfuacht. Der Zasteera. Er zasteat net nua Liebesliada sondan a mi. Wasa a, dass meine Hoa goidn glänzn? Und das I sovüh Liab in mia trog, fia ois Scheene auf da Wöd? Es wiad eahm sicha net itarressian. Oba do, do a riesiga dreckiga Haxn von eahm in mein Regnbogn! Er hockalt se zu mia und frogt mi ob eh ois Okee is und i plaz drauf los. Waunn i mein Kopf aun sei Schuita leg und meine Tränan üba eahm rinnan, vielleicht heulicht eahm des.
Englstränan.