Mitglied
- Beitritt
- 23.03.2005
- Beiträge
- 6
De Bim und da Unfoi (Wienerisch)
Bin i unlängst bei da Bim-Station gstondn. Jessas na, do hots an Bumpara
gmocht. Natirlich woar i a weng aufgschreckt und neigierig und hob
gschaut. Duat vuan, genau, wo de Bim ums Eck kumman soit, duat san zwoa
z'sommdunnat. I kennt net sog'n, wos passiert ist, wöl i woa in a Biachl
vatiaft. Und a, wonn mia des Szenario grod durch den goa laut'n Tuscha
ins Bewusstsein drängt hot, is mia des grundsätzlich wurscht, wos do
passiert is. Oba jetzt, wo i des waß, hoit i mi liaba wiada ons Biachl.
Long brauchts oba net, bis i scho de erst'n Sirenan hea. De
Zwetschk'nschleida, de do dazuagheat, is mit an Karacho an uns
vuabeibrettat - a Sani woas. I woß olladings net, warum ea so an Krawö
mocht, immahin is de Stoßn recht unbefoan und vun ana Seitn kummt eh ka
Kröwe mea vuabei. Meine Aug'n gengan mit dem Kronknwogn mit und wia ra
am Unfoi onkimmt siech i, dass hinter deara Havarie scho mei Bim steht.
So a Dreck, z'Fuaß geh is bei dea Distanz net drin, jetzt muaß i woatn.
Ah, und do kummt jo scho des, worauf i woat: A Botz'n Lkw schiaßt an uns
vuabei, a Blauliacht hot a a, oba außa dem lauteren Motor is a dezenta
untawegs wia sei Vuagänga. De Feiawea is's. Und desmoi konn i mi'm Blick
net foign, wö kleim dahinta kummt a scho da easte Kibara. Ea hot a vü
schmuckeres Auto - an schenan Ford - und lahn a uadantlich im Gas. De
Sirenan geht eam olladings ah net so wia beim Sani. Wäarend da Foara vom
Ford in de Bremsn happt foit ma auf, dass de Bim-Station doch recht voi
wurd'n is. So sicha olladings, dass de Leit olle auf'm D-Wogn woatn, bin
i mia oba net. Do stengans, de oidn Schastrummen, de feinen Damen da
Stodt, und köbben: "Schaut's eng des on..." und i denk ma no, wö mia in
dem Moment mei Großmuata eifoid, dass, egal wos kummt end't mit "Wia hom
jo nix g'hobt frira!" Und long hob i net woatn miaßn. Soboid de Oidn
aufhuastn kummt des imma. De gonz Oidn hängan gean no amoi on "Unter'm
Hitla hätt's des net geb'm!" Schau on, wia's motzn: D'Leit san jo ollewö
so hektisch und kennan übahaupt net aufpass'n. Kontrollian tuat's jo ah
kana mea. Ois wiad schlimma. Lauta Stuss hoit, wos oide Leit, de wos auf
se hoitn, so red'n.
Do steht a a klans Mensch mit ihra Muada. Se lahnt se gonz neigierig
vire, damit's a an guad'n Blick eahaschn konn. I red natialich von da
Muada, wö des Madl is vü mea an de vün Blauliachta intressiat. Des gibts
jo net! Jetzt bin i eh scho so miad, donn noch a so a Unfoi und de Leit
gengan mia a aufm Homma. Na, mia reichts, i geh jetzt z'Fuaß. Oda do
net? Na, i woat no a Wöl, vielleicht hob i jo Glick. I man, an'n Wickl
mit da Oidn wea i nimma auskumman, des is kloa. Oiso wat i no a poa
Minutal. Seng tua i leida nix von dem, wos vuan passiert. Najo, a weng,
es diafat net so schlimm gwesn sein. Dea Feiawea-Wogn is scho dabei, de
Vehikl vun da Stroßn zan raman. Seit's gscheppat hot san jetzt zwanzg
Minutn vargongan und i muaß mi imma no äagan, dass de Leit so bled san
und des a no so offn zagn. Und wia long dauert des no mit da Stroßnbohn?
Do woat i jo liaba aufm Eisstoß. Kam hob i des featigdocht, hot se auf
amoi de Bim in Bewegung gsetzt. Guat, des wa a wengal zu voaölig. Oba de
ane loss i foan, wö zwischen de Leit, de si bei da Station varsommet
hom, wü i in kan engan Raum eigspeat sei. I glaub de dritte hob i donn
gnumman. Wia i duat drinnan sitz und in meim Biachl les kummt ma auf
amoi a bleda Gedonke: I hob mi jetzt so vü üba'd Leit gäagat, dass ma
entgongan is, dass i daham woascheinlich genau's gleiche darzön wead wia
de ondan. I man, i weas sicha eawähnan und mei Frau wiad sicha frogn,
wos gwesn is. Und donn wiad ia de gleiche Gschicht auftischt wia den
Monnan von de oidn Weiba und dem Vota von dem oan Kind. Nur olle wean
des daham mit ana gewiss'n Begeisterung weitatrotschn, nua i wead sogn:
"Jessas, des woa a Drama!" Oiso, wea is jetz eigentlich da Gscheitare? I
moan i! Oba wea is da Glicklichare? Se!
A Wohnsinn, wonn i ma denk, dass i eigentlich bei meim Denkn nua an
Schritt weitagongan bin und me söbst in an unkomfortablen Zuastond
varsetzt hob damit? S is ois a weng a Schas. Najo, liaba deppat leb'm
ois unglicklich steam. Des nexte moi gaff i a!